Meghalaya sorkar ordinance HC-in a hnawl

Meghalaya High Court chuan Khasi khaw­tlang hruaitu (Rangbah Shnong) te hnena sorkar dan hnuaia thuneihna pek­na tur state sorkarin ordinance a siam chu a hnawlsak.

Chief Justice Uma Nath Singh leh Justice TNK Singh te awmna division bench chuan headmen te thuneihna dan hmanga pawmna tur chungchanga Khasi Hills Autonomous District Council (KHADC) leh state sorkar inkhinna thubuai a ngaihtuah ṭumin court-a thubuai kal lai kaihhnawihah dan siam theih a ni lo, tiin state sorkar ordinance hi a hnawl.

KHADC counsel G Massar chuan hearing neih zawhah High Court chuan state sorkar ordi­nance siam chu court thu­buai ngaihtuah lai tibuai thei a nih avangin pawm theih a ni lo tiin a sawi a ti a, court thubuai ngaihtuah laia inrawlh tumna a nih chuan court chuan a thuchhuak zah lohna thubuai (contempt of court case) a siam theih thu a sawi bawk.

Nikum December 10 khan Justice SR Sen awmna bench headmen te thuneihna chu India danpui palzutna a ni tiin a tihtawpsak a ni. Meghalaya-a Khasi te chenna bialah chuan re­sident certificate emaw sorkar lehkha pawimawh lak dawnah headmen te phalna, no objection cer­tificate (NOC) lak hma­­­sak a ngai ṭhin a, an pawm­puina lo chuan re­sident certificate neih theih a ni ṭhin lo. Head­men te chu sorkar danin a pawmpui hnuah chauh hetiang certificate hi an pechhuak thei ang, tiin Justice Sen chuan court thutlukna a siam dawnah a sawi.

High Court-in head­men te thuneihna tih­tawp­­sak hnu hian KHADC leh state sor­kar chuan theihtawp chhuahin headmen te chu dan hnuaiah hum an tum a, state cabinet chuan dan hmanga head­men te thuneihna pawmpuina atan kumin May 11 khan Meghalaya Local Administration (Empowerment of Tra­ditional Institutions, Tra­ditional Bodies, Head­­men in Governance Delivery System) Ordi­nance, 2015 a pawm a ni.

Hearing neih ṭum­in KHADC counsel Mas­sar hian state sorkar ordinance siam hi High Court a hriattir a ni.