Manipur-ah Migrant Workers Bill dodal

Manipur-a inner line permit (ILP) system kalpui phuttu, Joint Committee on Inner Line Permit System (JCILPS) chuan Ningani khan Manipur Re­gulation of Visitors, Tenants and Mi­grant Workers Bill, 2015 chu bill thara thlak phutin, a dodal.

Migrant Workers Bill duh loh lantirna atan hian Imphal-ah kawng zawh a ni a, hmeichhia leh zirlai ṭha­hnem tak an tel. State sorkar chu Manipur leilung fate humhalh thei loah an puh a, humhalh an duh thu an auchhuahpui bakah Manipur-a pemlutte lak aṭanga leilung fate humhalh nan eng mah tiloah state sorkar an puh bawk.

Kawng zawhte hi state Assembly panin an kal a, mahse budget session neih lai a nih avangin police te'n an lo dang. Police te'n an lo dan hnu hian an innawr zui nghal a, kawngzawhte danna bang kaltlang tumte chu tianga vuain, hliam tuar erawh an awm lo.

Police te'n an lo dan avanga lungawi lo zirlaite chuan kawngpuiah thingtum leh bawlhhlawhte dahin kawngpuia lirthei tlan an dang zui nghal bawk.

JCILPS Women Wing hotu Gynesh­wor chuan state sorkarin tun hnaia Manipur Regulation of Visitors, Te­nants and Migrant Workers Bill 2015 a pass chu ṭha tih loh thu sawiin, leilung fate humhalhna atana dan huam zau zawk a duh thu a sawi.