Tripura-ah Indo-Bangla Maitri Park hawng dawn

Bangladesh Prime Minister Sheikh Hasina chuan South Tripura district, Belonia hmunah kumin November emaw December emaw hian Indo-Bangla Maitri Park a hawng dawn.

Tripura sorkar official chuan hemi chungchang hi sawiin, Bangladesh Prime Minister Office-ah sawmna lehkha an thawn thu leh an lo pawm thu a sawi a, mahse a ni tur erawh an tihchian theih rih loh thu a sawi. "November emaw December emaw hian Tripura a rawn tlawh dawn a ni," a ti.

Maitri Park hi kum 1971-a Bangladesh (East Pakistan)-in Pakistan lak aṭanga zalenna a sualna, Bangladesh Liberation War ṭanna hmunah hawn a ni dawn a, Bangladesh zalenna atana India-in a puihna leh a thlawp tih lantirna tur a ni.

Park siamna atan hian Bangladesh Foreign Mi­nister Dr Dipu Moni chuan kum 2010, November khan lung a lo phum tawh a ni. Sorkar laipui chuan sensoah cheng vaibelchhe 2.30 a ruahman.

Park-ah hian ram pahnih Prime Minister hlui, Indira Gandhi leh Sheikh Mujibur Rahman lim dah a ni ang a, indo hriatrengna, feet 40-a sang sak a ni bawk ang.

Maitri Park din rawt­tu, Belonia bialtu MLA Sudhan Das chuan, "Maitri Park hian Bang­la­desh Liberation War laia Tripura mipuite in­pek­­na leh beihna min hriat­chhuahtir ṭhin ka beisei," tiin a sawi.