Kum 27-a upa thubuaiin SC tilungawi lo

Assam leh Nagaland ram inchuh thubuai kaihnawiha Assam-in kum 27 kaltaa Supreme Court-a thubuai a thehluhah Nagaland (defendant)-in hearing tihkhawtlai a ngenna chuan Surpeme Court a tilungawi lo hle.

"Thubuai hi ramri tihchianna tur lam a ni a, kum 30 dawn chin­fel lohin a khawtlai tawh a ni. Insawifiah ngai Nagaland hi hea­ring kan tihkhawtlaisak tawh lo ang," tiin Justices T S Thakur leh Justice R Banumathi te awmna SC bench chuan thuchhuah a siam.

Nagaland advocate general thar chuan kum 1988 khan lehkha pawimawh ennawn leh zirchiang ngai a neih avangin hearing chu tihkhawtlai a lo ngen tawh a, hemi ṭum hian SC bench chuan tihkhaw­tlai phalsakin hearing neih ni atan September 7, 1988 a ruat a ni.

Tun hnai khan Supreme Court Registrar (Judicial) Rachna Gupta chuan he thubuai hi chhuizuiin, state pahnihte hian an ṭanna finfiahna atana lehkha pawimawh an thehluhte chu an pawm nge an hnawl tih a ennawn a ni.

Supreme Court chuan a hmain Assam leh Nagaland ram inchuh thubuai chu dan hmanga chinfel emaw state pahnihte inbiakna hmanga chinfel a ṭhat thu a tarlang tawh a, kum 1988-a thubuai theh­luttu Assam sorkar counsel chu thu­hretu a koh turte list leh an thu­sawi­te chu affidavit kaltlanga thla thum chhunga thehlut turin a hriattir bawk.

Hetihlai hian Solicitor General Ranjit Kumar chuan Surveyor Ge­neral of India (SGI) report ṭan­chhanin, Assam-Nagaland ramri chu SGI map rintlak a nih loh avangin a tihchian theih loh thu a sawi.

Assam-Nagaland ram in­chuh thubuai hi kum 1963-a As­sam Naga Hills district aṭanga Nagaland state hran siam a nih aṭangin a inṭan tawh a ni. Naga­land chuan ram bung ṭhenkhat chu hman­lai aṭanga a ram neih tawh nia ngaiin, Naga mite ram chu Nagaland-ah rinluh vek a phut a ni. Hetihlai hian Assam lam chuan kum 1963, December 1-a Assam aṭanga Nagaland state siam a nih laia ramri an siam chu state pahnih ramria hman tlang a duh thung.