Tribal-te dikna humhim a ngai : Assam CM

Chief Minister Sarbananda Sonowal chuan 'Tribal rights' chu engti kawng pawhin humhim a ngai a, a ṭul a nih chuan state sorkar chuan sum a seng mai tur a ni, a ti.

Assam CM hian Pathianni khan 'Vision Document', Akhil Bharatiya Vanavasi Kalyan Ashram (ABVKA) buatsaih a tlangzarhnaah he thu hi a sawi a ni. State chhunga tribal-te dikna chanvo humhalh chu sorkarin a tihmakmawh a ni a ti a, suma lei a ngai a nih pawhin harsatna a awmtur a ni lo, a ti. Tribal society chu chawisan a ṭul thu sawiin, reitheihna ata ding chhuak turin ziak leh chhiar thiam mai bakah, thiamna tak tak an neih a ngai a ni, a ti. Tribal-te chenna ramchhunga dan kalha pem lut emaw khawsa emaw an awm a nih chuan sorkar chuan a bawhzui zel dawn a, ram leilung fate dikna chanvo humhalh a nih theih nan sorkar chuan sum eng zat pawh a seng mai tur a ni, a ti. Tribal zingah ziak leh chhiar thiam lo, khawsak harsat tak tak leh khawsak phung mawlmang tak an la tam hle niin a sawi.

Sonowal chuan state sorkar leh sorkar laipui chuan tribal-te chawikang turin hma a la reng tih sawiin, hmasawnna tak tak chuan mi hnuaihnung ber a thleng phak tur a ni a ti. Sorkar scheme reng reng a hlawhtlin theih nan chuan mipuite thawhhona ṭha a ngai a, chu mi tur chuan hnam hrang hrangte inkarah inpumkhatna a awm a ngai a ni a ti. Tribal-te chu khua leh tui tana chenfakawm ni zel tura a duh tih sawiin, ṭhalaite chu ruihhlo laka fimhlim turin a fuih bawk.

Prime Minister Narendra Modi kaihhruai sorkar chuan hmasawnna scheme-Jan Dhan Yojana, Fasal Bima Yojana leh a dang eng emaw zat a duang a, hengte hi ṭangkaipui ngei tum tur a ni, a ti. 'Vision Document' tlangzarh takah chuan ABVKA chuan tribal society-te dinhmun tawn mek chu chiang takin a tarlang tih sawiin, he document hi a sorkar-in tribal dinhmun chawisang tura a hmalakna kawngah a ṭangkai dawn hle a ni, a ti. Document hian sorkarin tribal welfare scheme a siamna turah a pui nasa dawn hle tih a sawi.