Assam CM-in Civil Service Officer te fuih

Assam Chief Minister Sar-bananda Sonowal chuan Assam sorkar hnuaia Civil Service Officer-te chu an hnathawhnaah dikna leh dawhtheihna neih turin a duh tih a sawi.

Kar kalta Inrinni khan Assam Administrative Staff College, Khanaparaan-ah kum 2013-15 chhunga Civil Service Officer-a inziak tlingte pualin inkawmkhawmna hun buatsaih a ni a, he hun hi CM hian a hmanpui a ni. CM chuan Civil Service Officer-te chu kum naupang zawkte leh ṭhalai tam takin an ngaihsan rawn an nih thu hrilhin, an hnathawhna kawngah dik leh rinawm taka thawk turin a duh tih a sawi. Mi tam tak ngaihsan leh entawn an nih ang ngeia awm tura fuihin, sorkar tichaktu an nih thu a sawi bawk.

He hunah hian Civil Service Officer-te pawimawhna leh an hnathawh hrang hrangte tarlan a ni a, infuihna hun atan hman a ni. Chief minister bakah hian Transport minister Chandra Mohan Patowary, Chief Secretary V K Pipersenia, Additional Chief Secretary VB Pyarelal leh T Y Das, Principal Secretary Pawan Borthakur, Press Advisor to Chief Minister Hrishikesh Goswami-te'n an hmanpui a ni.