PG Teacher-te Gazetted status pe thuai dawn : Khandu

Arunachal Pradesh Chief Minister Pema Khandu chuan state sorkar enkawl school-a post graduate teachers (PGT) thawk mekte chu Group 'B' Gazetted status pek an ni thuai dawn tih a sawi.

September 5-a Teachers' Day lawm a nih khan, CM Khandu chuan senior teacher-te chu Gazetted status pek an nih tur thu a lo sawi tawh a ni. Hemi chungchang bawhzui hian kar kalta Inrinni khan Arunachal Teachers’ Association (ATA)-te chuan Khandu an kawm a, Education Minister hnena an thil phut hrang hrang an thlen tawhte an sawipui a ni. Khandu chuan ATA-te thilphut chu ngaihtuah sak a tiam a, hmalak thuai a nih tur thu a lo hrilh. ATA aiawhte chuan CM chu a lo intiam tawh ang ngeia Gazetted status pek an nih thuai theih nana hma la turin an ngen bawk a ni.

ATA thil phut zingah hian Elementary leh Secondary Education, department hrana an awm theihna tura chak zawka hmalak te, Sarva Shiksha Abhiyan (SSA), Rashtriya Madhyamik Siksha Abhiyan (RMSA) leh Kasturba Gandhi Balika Vidyalaya (KGBV) hnuaia thawk zirtirtute hlawh pek chhuah thuai te a tel.