Ziak leh chhiar thiam tamna ber Tripura

Tripura-a ziak leh chhiar thiam awm zat chu 97.22% a ni a, India rama ziak leh chhiar thiam tamna ber state nia tarlan a ni.

Chief Minister Manik Sarkar chuan kum 2011 chhiarpuia Tripura literacy rate chu 87.75% a nih thu sawiin, India ramah pangana a ni, a ti. Hei hi kum hnih hnuah 94.65%-ah kaichhoin, 2016-ah chuan 97.22%-ah a kaichho leh a, India ramah a sang ber an ni ta tih a sawi. CM chuan hmasawnna chu ropui a tih thu sawiin, state sorkar leh mipuite thawhrah a ni, a ti.

School education Tapan Chakraborty chuan India rama ziak leh chhiar tamna ber state an ni ta chu lawmawm a tih thu sawiin, hmasawnna duhawm berte zing a mi a ni, a ti. Minister chuan state chhungah khawpui aiin thingtlangah ziak leh chhiar thiam an pung chak zawk tih sawiin, khawpui aiin 2.88% laiin ziak leh chhiar thiam an tam tawh zawk a ni, a ti. Chakraborty chuan district pariat zingah Unakoti (98.09%) chu literacy rate sanna ber a ni a ti a, hetih lai hian south Tripura chu a hniamna ber niin 95.96% a ni, a ti bawk.

CM Manik Sarkar chuan state sorkar chuan literacy mission a kalpui zel dawn tih sawiin, tuna an hlawhtlinna chu an tawpna tur a ni lo tih a sawi.