Manipur hospital-ah Mipat hmeichhiat kaihhnawiha endik tam

Manipur Deputy Chief Minister Gaikhangam chuan kumtinin pawng-sual kaihhnawiha Foren-sic Department-te'n Jawaharlal Nehru Institute of Medical Sciences (JNIMS) leh Regional Institute of Medical Sciences (RIMS)-a an endik mi 300 vel an awm ziah tih a sawi.

Kar kalta Zirtawpni khan Continuing Medical Education programme, Jawaharlal Nehru Institute of Medical Sciences (JNIMS) Auditorium-an buatsaih a ni a, he hun hi Gaikhangam chuan a hmanpui a ni. Deputy Chief Minister chuan mipat hmeichhiatna kaihnawiha endik zingah hian kum naupangte te pawh an bang chuang lo tih sawiin, hemi titawp tura hmalak a ngaih thu a a sawi. Sex kaihhnawiha inhnamhnawih man eng emaw zat an awm ṭhin chu state ang pawha mualphona a nih thu sawiin, a venna kawngah hmalak a ngai tak zet tih a sawi. Forensic Lab-te chu tihchangtlun an ngai tih sawiin, sualna chi hrang a pun chak avangin fimkhur a ngaih thu a sawi bawk.

Gaikhangam chuan sex kaihhnawiha a tuartu tam tak chu tihsual nei lo leh naupang tak tak te an ni a, pawngsual tawk finfiah ngai mi 300 vel an awm ṭhin chu a pawi tak zet a ni a ti. Hmeiche awm nem zawk leh naupang kum tling lote tawrhna thleng ṭhin chu a dem tak zet tih a sawi.

National Crime Re-cords Bureau (NCB) report-in a tarlan dan chuan, India ramah hian second 17 zelah pawikhawihna a thleng a, hmeiche chunga hleihlenna chu minute thum danah pakhat zel thleng ang a ni. Minute 27 dan zelah mipat hmeichhiat rawngkaia pawikhawihna thleng anga chhut a ni bawk niin Gaikhangam chuan a sawi a ni.