APCM-in hma lak pui turin Goyal ngen

Arunachal Pradesh Chief Minister Pema Khandu chuan Union minister of State for Power (independent charge), Piyush Goyal chu Subansiri Lower Hydroelectric Project-in a nghawng chhung-kuate hnena zángnadawmna pe chhuak thuai tura hma lak pui turin a ngen.

Subansiri Lower Hydroelectric Project hian West Siang district-a ram hectare 1,200 a awh a, ram neitute chu tun thlengin zángnadawmna pek an la ni lo nia tarlan a ni. Compensation demand committee chuan National Hydroelectric Power Corporation (NHPC)-in hun rei tak chhung zángnadawmna pe lo a project a kalpui chu ram leilung fate ngaih pawimawh lohna a nih thu an sawi. Hemi chungchangah hian committee chuan Union minister of state for home affairs Kiren Rijiju chu hma lak pui turin an lo ngen tawh a, Prime Minister Narendra Modi hnenah memorandum an thehlut tawh bawk. CM Khandu chuan September 5 khan Goyal hnenah hian hemi chungchang hi ziakin a thlen.

NHPC hian kum 2008 khan project-in a nghawng chhungkua hnena pek turin zángnadawmna Rs 84,11,97,750 a lo pe chhuak tawh a, mahse zángnadawmna pek chhuah danah hian NHPC chuan Land Acquisition Act, 1894 leh Arunachal Pradesh R&R Policy, 2008 a zawm lo niin Khandu chuan a sawi.

Zángnadawmna pek chungchangah hian project-in a nghawng thingtlang khua leh NHPC-te chuan kum 2001 khan inremna an siam a, inremna an siam ang hian zángnadawmna pek chhuah a ni lo nia tarlan a ni. NHPC-in zángnadawmna atana a pek Rs 84,11,97,750 chu a dik tawk lo nia tarlan a ni a, a pek chhuah tur zat dik tak chu Rs 503,40,08,141 nia sawi a ni.

Khandu chuan Goyal chu NHPC-in zángnadawna a pek chhauh tur zat pe chhuak thuao tura hma la turin a ngen. Project atana tuikhuah hi Arunachal Pradesh leh Assam inrinna laiah a ni a, tuikhuah hian Subansiri luidung leh a kam km 47-a zau a chim a ni. Subansiri Lower Hydroelectric Project hian power mega watt 2000 a thar chhuak thei tura ngaih a ni. Mahse mi tam tak chuan sawiselin, Assam state tan a him tawk lo niin an sawi a, environmentalist tam takin an dodal bawk.