Maghalaya sorkar rintawk lohna motion ngaihtuah dawn
Meghalaya-a eptu party Meghalaya People’s Front (MPF) leh Hill State People’s Democratic Party (HSPDP) chuan Thawh-
ṭanni khan Mukul Sangma kaihhruai Congress sorkar rin tawk lohna no-confidence motion pu lut turin hriattirna an chhuah.
Meghalaya Assembly autumn session ni hnih awh chu kar kalta Zirtawpni khan zawh a ni. Session zawh aṭanga ni hnih hnuah opposition-te'n sorkar rintawk lohna no-confidence motion pu lut tura hriattuirna an chhuah avang hian, hemi chungchang hi vawiin hian ngaihtuah a ni ang. Hei bakah hian opposition lamin Assembly speaker Abu Taher Mondal chu speaker a nihna tlin lo leh hmang dik tawk loah puhin, ban an phut a, hemi chaungchang pawh hi September 16 hian ngaihtuah a ni dawn bawk a ni.
No-confidence motion hi opposition chief whip James Sangma, HSPDP legislator Ardent Miller Basaiawmoit leh United Democratic Party legislator Jemino Mawthoh-te chuan session Assembly Secretary-ah an thehlut a ni. Assembly speaker chuan, "Congress kaihhruai sorkar rintawk lohna 'no-confidence motion' hi house-ah put luh a nih hmain zirchian a ni dawn a, vawiinah ngaihtuah a ni ang" a ti. Motion hi House member 10 talin an thlawp loh chuan House-ah put luh theih a ni lo, a ti bawk.
James Sangma chuan, “Congress kaihhruai sorkarah mipuiten rinna an nghat ngam tawh lo a, sorkar hian mipui sorkar din loin party sorkar a din zawk a ni. Oppositoin kan nih ang ngeiin kan tih tur dik tak tiin house-a no-confidence motion putluh a nih theihna turin hma kan la ta a ni" a ti. James Sangma chuan sorkar chu dan leh thupek kenkawh kawngah a hlawhchham chiang hle niin a sawi a, hmeichhe awmnem zawk leh naupang pawisawi lote chungah hleilenna a hluar hle a ni, a ti. Sorkar chuan a khua leh tuite himna a pe thei lo niin a sawi.
Meghalaya Assembly-ah hian member 60 awmin, rorel lai Meghalaya United Alliance-ah Congress MLA 30 leh, Nationalist Congress Party MLA 2 leh Independent 11 an awm. Opposition lamah United Democratic Party (8), Nationalist People’s Party (2), Hill State People’s Democratic Party (4) leh Independent 3 an awm a ni.