Assam Legislative Assembly aṭangin MLA Gogoi hnawt chhuak

Assam-a Raijor Dal MLA, Akhil Gogoi chu Guwahati-a tui pekna nena inzawm Jal Jeevan Mission-ah eirukna a awm nia a sawi avangin Assam Legislative Assembly aṭangin hnawh chhuah a ni.

Akhil Gogoi hian Jal Jeeven Mission fund tih chingpen a nih tih sawiin, hemi chungchang hi an high-level chhui chian a phut a ni. A thusawi hian minister pakhat a ti lungawi lo hle a, mimal inbeihna atan a hmang zui niin a sawi a, he a thusawi avang hian House aṭangin hnawhchhuah a nih phah.

Assembly speaker Biswajit Daimary chuan Gogoi chu Governor thusawi chhung House chhuahsan turin a ngen a, Gogoi chuan House chu chhuahsan loin, thuziak a keng a, marshal-ten pawnah an hruai chhuak ta a ni.

Gogoi chuan Jal Jeevan Mission fund tih chingpen chu BJP rorelna hnuaia inbumna thleng lian ber a ni tiin, state sorkar chu sum a enkawl danah sawiselin, rintlak loh tiin a sawi a, chhui chian a phut.

Assam Public Service Commission (APSC) hna lak chungchangah pawh Gogoi chuan thil dik lo a thleng tih a sawi a, dik lo taka hnathawka an lak zawng zawng ban vek a phut bawk. Hemi chungchang chipchiar taka sawi ho turin adjournment motion a dil a ni.

State chhunga sumdawnna kalpui dan ṭhenkhat pawh a ngaihṭhatthlak loh tiin Gogoi chuan a sawi a, sorkar chu siamṭha tura hma la turin a ngen. Gogoi chuan Umrangso lungalhthei khura chhiatna thleng chungchangah pawh a lungawi loh thu sawiin, he hmunah hian hnathawk 11 an tang mek a ni. Hnathawktute chhanchhuah kim an nih hma chuan Assembly session tih tawp a phut a, thil awmdan a hmuna endik turin fact-finding team tirh a phut bawk.