Manipur: Gender discrimination leh PC-PNDT programme hmang

Manipur-a Directorate of Family Welfare Service-ah February 18 khan joint meeting neih a ni a, mipa leh hmeichhia inthliarhranna chungchang leh state chhunga sex ratio siamṭhatna kawnga PC-PNDT programme-in chanvo a neih dante an sawi ho.

Meeting hi State Advisory Committee (SAC), State Appropriate Authority (SAA), leh State PC-PNDT Cell of Manipur ten an buatsaih a ni.

Family Welfare Services director Dr. N. Hemantakumar Singh chuan meeting hi a kaihhruai a, state chhunga e-commerce platform leh social networking site hrang hrangah PCPNDT Act (The Preconception and Prenatal Diagnostics Techniques (Prohibition of Sex Determination)) bawhchhiatna a awm leh awm loh enfiah a ngaih thu a sawi. E-commerce platform leh social networking site-a PCPNDT Act bawhchhiatna chungchangah advisory/regulation neih a ṭul thu a sawi bawk.

PC-PNDT Act, 1994 Section-22 chuan naute pian hmaa mipa nge hmeichhia a nih hriat theihna tur lam kaihhnawih advertisement siam a khap tlat a ni.

Dr Singh chuan meichhe naupang ṭanpui a, hamṭhatna hrang hrang pe ṭhin department dangte nena thawh hona programme neih a ṭul thu a sawi bawk.

Meeting neih chhung hian Dr. Sujata Huidrom, State Nodal Officer, PC & PNDT chuan thla thum kalta chhunga District zawng zawnga hmalakna hrang hrang a sawi a ni.