Meghalaya : CM-in inṭhendarhna politics hnawl turin ngen

Meghalaya chief minister leh National People's Party (NPP) president, Conrad K Sangma chuan nimin khan Meghalaya mipuite inṭhendarh thlen thei politics chu hnawl ngam turin mipuite a chah.

February 21-a Khasi Hills leh Jaintia Hills Autonomous District Council (KHADC-JHADC) inthlan neih tur atan Chief Minister hian Indo-Bangladesh ramri, Mawsynram biala Dangar khuaa election rally-ah thu a sawi a ni. CM chuan inṭhendarhna thlen thei politics lakah fimkhur a ngai a, mipuite inṭhen darh tir tumtu party-te chu hnawl turin mipui a ngen.

Sangma campaign-na te hi state chhunga bial rethei leh hmasawn lo ber zinga mi an ni a, heng hmunte hi Bangladesh nena an inhnaih avangin hnam hrang hrang inchawhpawlh an tam hle.

CM Sangma chuan kum tam tak Indo-Bangladesh ramri biala chengte ngaihsak loh leh thlathlam an nih dante hriain sorkar chuan a bial leh mipuite tihhmasawnna turin hma a la mek a ni, a ti. Inthlan hmasaa an lo tiam tawh, Balat-Dangar-Ryngku kawngpui pawh an siam tawh thu a sawi. Mipui chuan an aiawh tur hruaitu an thlan thiam an mamawh thu a sawi bawk.