ILP phutute'n Manipur CM lim an hal

Manipur-a inner line permit system kalpui phuttu, Joint Committee on Inner Line Permit System (JCILPS) chuan kar kalta Zirtawpni khan Chief Minister Ibobi Singh, Deputy CM Gaikhangam leh Assembly Speaker Th Lokeshwor te lim an hal.

JCILPS student leh women wing te chuan state sorkarin Manipur Regulation of Visitors, Tenants and Migrant Workers Bill, 2015 a pass chu duh loin pemlutte lak aṭanga Manipur leilung fate humhalhna tur bill thara thlak an phut a ni.

Kar kalta Zirtawpni khan Migrant Bill duh lohna kawngzawh an huaihawt hnuah state assembly pana kawng an zawh chu police te'n lo dangin an innawr zui a, buaina liam tham erawh a chhuak lo. Hemi hnu hian Chief Minister, Deputy Chief Minister leh Speaker lim hi an hal.