BSNL-in Tripura-ah internet chak leh rintlak siam tum

Bangladesh Cox Bazar-a band­width hman loh te hman phalsak tura Bharat Sanchar Nigam Limited (BSNL) in Bangladesh sorkar remna thuthlung a ziahpui hnuah Tripura chuan Mumbai leh Chennai anga internet chak leh rintlak a nei dawn.

BSNL leh Bangladesh sorkarin remna thuthlung an ziah angin BSNL hian 10 Gigabyte Internet connectivity pekchhuah a tum a, hei hi hmarchhak bial mai ni lo India ram state dangte pawhin an hman theih beisei a ni.

Internet connection 10 giga­byte atan hian BSNL chuan Bangladesh Cox Bazar-a sub­marine cable a thlunzawm dawn a, hemi atan hian Bangladesh hnenah kum khatah vaibelchhe 7.2 a pe ang.

BSNL (NE Circle-I) Chief General Manager DP Singh chuan he ruahmanna bawhzui tur hian Union Telecom Minister Ravi Shankar Prasad-a'n karleh hian Tripura tlawh a tum thu a sawi.

BSNL hotu Singh chuan Cox Bazar aṭanga Agartala thlenga Optical Fibre Cable (OFC) Net­work zamna tur hi Prime Minister Narendra Modi-a'n June 5-a Bangladesh a tlawh ṭumin inremna a ziahpui tih a sawi.

"OFC Network hmanga Agar­tala leh Cox Bazar thlun­zawmna tur hi ruahmanna anga a kal a nih chuan thla thum emaw thla li hnuah peihfel beisei a ni a, network hi thlunzawm a nih chuan Tripura chuan Delhi, Mumbai leh Chennai vela internet facility an hman ang a hmang thei tawh dawn a ni," a ti.

BSNL General Manager Singh hian Tripura-a BSNL facility tihchangtlun tur chungchangah Chief Minister Manik Sarkar a hmu bawk a, mobile tower te'n mihring tana hlauhawm tur radiation a siamchhuak tia thuthang awm chu thu dik lo a ni, a ti.

"Mobile tower te'n mihring tana hlauhawm radiation an siamchhuak tih chu thu dik lo a ni. Telecom Ministry hnuaia wing hran - Term Cell-in mobile tower radiation siam chu an endik ṭhin," tiin a sawi.