Manipur-ah IT Park hawng

Manipur Chief Minister Ibobi Singh chuan kar kalta Inrinni khan Imphal-a Mantripukhri-ah Manipur-a Information Technology (IT) Park hmasa ber leh Indian Institute of Information Technology (IIIT) Manipur temporary campus a hawng.

IIIT Manipur hi hmarchhak biala a pahnihna leh India rama a 13-na a ni. IIIT hi Guwahati-ah hawn a ni tawh bawk. IIIT Manipur hi Senapati district-a Mayangkhang Ningthoupham-ah hawn tur a ni a, campus atan hian state sorkarin ram a tifel vek tawh bawk. Campus thar hi siam ṭan a la ni loh avangin Mantripukhri-a IT Park-ah hian hawn lailawk a ni dawn a, tun thla aṭanga academic session ṭan beisei a ni.

IT Park leh IIIT Manipur hawnna inkhawmah Chief Minister Ibobi chuan thu sawi­in, "IT industry din tura kan inbuatsaihnaah hma lam kan pan zel a, IT industry chuan ṭhalaite tan hnathawh tur a siam bakah state mamawh revenue kan hailuh theih phah dawn a ni," a ti.

IT Park hi square feet 45,000-a zaua siam tum a ni a, mahse a thawh khatna sq ft 20,000-a siam zawh a nih hnuin state sorkar chuan IT SEZ (special economic zone) siam a rel leh ta zawk a ni.

Manipur-a IT SEZ kalpuina atana hian Indian Institute of Management (IIM), Ahmedabad chu zirchianna nei tura rawih a ni a, IIM, Ah­medabad chuan state sorkar chu IT SEZ kaltlangpui turin thurawn a pe a ni.

Chief Minister chuan IT industry leh zirna kalphung chu thlunzawm a pawimawh thu sawiin, IIT Manipur leh IT SEZ chu IT industry hma­sawnna atana thawk tur a ni, a ti.

Ibobi chuan July 1 aṭang­in state sorkarin Digital India Week a hman ṭan thu sawiin, sorkarin digital India chungchangah mipuite zirtirna a pek tur thu a sawi bawk a, online service tihchangtlun nan Digital India chu in­fras­tructure mamawhte tihchang­tlunna hmanrua a nih ngei a beisei thu a sawi.