Indo-Bangla rail project atan Tripura-in fund a dil

India leh Bangla­desh-a rel service tur, rel kawng project kalpuinaa mimal ram lakna atan Tripura sorkar chuan sorkar laipui fund a dil.

Agartala aṭanga Bang­­ladesh, Akhaura thleng rel kawng siam tur hi kilometre 15-a thui a ni a, Tripura lamah kilometre 5-a thui a ni a, Bangladesh lamah kilometre 10-a thui a ni.

Tripura Transport Se­cretary Samarjit Bhowmik chuan rel kawng siamna atana mimal ram lakna tur hian cheng vaibelchhe 302 ruahman a ni, a ti a, mahse NITI Aayog mee­ting chuan ruahmanna thar a siam hnuah cheng vaibelchhe 98-a tihtlem a ni, a ti.

Rel kawng siamna atan hian ram acre 67 mamawh a ni a ti a, ram mamawh 60% vel chinfel nan sorkar laipuiah fund an dil tawh thu Bhowmik chuan a sawi.

Rel kawng siamna senso hi India-in a tum vek dawn a, Bangladesh chuan India chu Ashuganj lawng chawlh hmun hman a phalsak thung ang.

Bhowmik chuan mimal ram lakna senso state sorkar tum tura ruahman a ni a, mahse state sorkar chuan sum a neih loh avangin a pawm thei lo a ni, a ti.

India-Bangladesh rel kawng chu peihfel a nih chuan hmarchhak state zawng zawngin Bangladesh-a Ashuganj lawng chawlh hmun chu an chhawr ṭangkai thei dawn a ni, a ti.