NGT hearing neih hun atan July 8 a ruat

National Green Tribunal (NGT)-in nikum April 17-a Me­ghalaya-a lungalhthei laih­chhuah a khap chung­changah hearing neih leh hun atan July 8 a ruat.

Meghalaya sorkar counsel Ranjan Mukherjee chuan he thu hi sawiin, lungalhthei laih­chhuah sa hralhchhuah hun leh state sorkar hnena royalty (chhiah) pek hun chu pawtsei tura dil an tum thu a sawi.

NGT chuan lungalhthei laichhuah tawh sa hralhchhuah nan leh royalty pek hun atan a hmain June 30 thleng hun a lo hawng tawh a, lungalhthei neitute pawhin he hun hi pawhsei an duh a ni.

July 8-a hearing neih hunah hian state sorkar aiawhtu, Mukherjee chuan lungalhthei laihchhuah khap a nih hnua hemi kaihhnawiha state sorkar hmalakna hrang hrang, status report thehluh an tum thu a sawi a, Meghalaya-a deputy com­missioner (DC) hrang hrang te'n an district huam chhunga NGT thuchhuak palzuttute chunga action an lakna report thehluh a ni bawk ang.

State sorkarin lungalhthei laichhuah zel dan tura rua­hmanna a siamte NGT hnenah a thlen bawk dawn a ni.

Meghalaya-a lungalhthei laihchhuah dan turah rua­hmanna siam turin Guwahati-a Coal India Limited leh Mine Safety Director General bakah Central Mine Planning and Design Institute-a official te chuan June 17 leh 18 khan zirchianna an nei tawh bawk a, zirchianna report hi NGT-a thehluh tur a ni. Mithiamte hian state sorkar official te an kawm bakah Jaintia Hills-a lungalhthei khur hrang hrangte an tlawh bawk a, tun lai thiamna leh environment-a chhiatna thlen tam lo zawnga lungalhthei laihchhuah dan kalphung thar duan an tum a ni.