Naga nurse te tiam chin awm loa nawrh tum
Nagaland Staff Nurse Association (NSNA) chuan an thil phut chungchangah state sorkar aṭanga chhanna mumal an hmuh loh avangin tiam chin awm loa nawrh huaihawt an tum thu kar kalta Inrinni khan a puang.
NSNA president Catherine chuan thuchhuah a siamah ni ruk chhung mass casual laa nawrh an huaihawt chhungin state sorkar aiawhte nen level hrang hranga inbiakna an neih thu a sawi a, mahse chhanna mumal an hmuh loh thu a sawi.
Naga nurse association hian staff nurse te kalphung siamṭhat phutin, nursing degree leh diploma nei lo nurse te chu clinical lama hna siamsak tur leh degree leh diploma holder te chu teaching leh tutoring line lama hna siamsak an phut a, hemi atan hian Nurse's Service Rules, 1988 siamṭhat an phut a ni.
Hetihlai hian Health and Family Welfare Commissioner and Secretary M Patton chuan June 30 khan Nurse's Service Rule 1988 chu general nursing staff te tan a ṭhat loh thu sawiin, general nurse te chuan thla thum chhung subject hrang hranga training an neih phawt loh chuan promotion an hmuh theih loh thu a sawi a, hei vang hian nurse te phut angin ennawn a, siamṭhat an tum thu a lo sawi tawh a, mahse hei hian hun a duh rei tur thu a sawi bawk.
Naga nurse te hian a thawh khatna atan June 26 khan an hnathawhnaah badge dum belin an lungawi lohna an lantir tawh a, June 29, 30 leh July 1 khan a thawh hnihna atan ni thum chhung mass casual leave an la leh a, hei hi kar kalta Inrinni, July 4 thleng pawhsei a ni.