Assam Rifles-in IPS officer hmeichhe puhna pha

Assam Rifles chuan Manipur-a IPS officer hmeichhia-in AR sipai pakhatin Manipur check post-ah mawi lo takin a khawih tih leh, dan loa Myanmar rama luta bungruate leia a puhna chu thu dik lo leh phuah­chawp mai a ni tih a sawi. 

IPS officer-in an sipai a puhna chungchang hi chhui chian an tiam nghal bawk. 

Manipur police-te chuan IPS officer hmei­chhiain compalint a thehluh behchhanin, rifleman PK Pandey chu January 19-a Khu­dengtabi check post-a IPS officer hmeichhe chunga mawi lo taka chea puhin FIR an ziaklut a ni. State women commission chuan Pandey hi January 27-a an hmaa inlan turin a ko bawk a, officer com­plaint thehluh hi  Natio­nal Commission for Women leh Chief Minister’s Office-ah an thawn tel bawk. Chief minister N Biren Singh pawhin dan ang takin action lak a ni dawn tih a sawi. 

Hetihlai hian para­military force-te chuan January 19 tlaiah khan check post-a enfiah turin IPS officer leh amah zuitute hi lo tihdin a ni tih sawiin, civil dress veka an inthuam thu leh, tunge a ni tih an hriat mai loh thu a sawi. Endik an ni tur chu he officer leh amah zuitute chuan ṭawngkam mawi lo takin an lo ṭawngkhum a, a lehkha enfiah tur an dil pawhin pe duh loin, 'Tunge ka nih min hre lo em ni?' tiin sipaite chu a lo aukhum niin an sawi. Hemi hnu hian thla te a la zui a, rifleman PK Pandey hian check post-a thla lak chu khap a nih thu pawh a hrilh a ni, a ti. IPS officer chet dan chu thuneihna dik lo taka hmanna nia an ngaih thu an sawi thung.