Tualchhung mite police station kawtah pungkhawm

Thawhlehni zana Manipur police te'n mi pakhat an kah hliam avanga lungawi lo mipuite chu Nilaini khan Imphal-a, Singjamei police station-ah pungkhawmin, police station-a hnathawkte chu sawnchhuah vek an phut.

Singjamei Mayeng­bam Lei­kai-a khawsa Ngangom Robinson (32) chu Thawhlehni zan khan inner line permit (ILP) system kalpui phuttu ṭhenkhatin an bei a, hetah hian police te'n an kap hliam tiin tualchhung mite chuan an sawi.

July 8-a JCILPS kawngzawh­naa tel, Sapam Robinhood Singh thihna avanga lungawi loh lantir nan Thawhlehni aṭanga khan Imphal-ah hian darkar 38 awh bandh huaihawt a ni a, bandh avang hian dawr te pawh khar vek a ni. Hetihlai hian Robinson hi a ṭhiante nen Thawhlehni zan khan AK Enterprises Tent House-ah chaw an eikhawm a, bandh huaihawttu JAC thuchhuak chuan tent house hi police te chuan kah chilh tiin an sawi.

Robinson hi a mal leh banah silai muin a deng fuh a, RIMS damdawi-ina enkawl a ni.

Police official chuan Robin­son leh a ṭhiante chu lung­a an vawm hnuah an tlanchhia tiin a sawi thung a, bandh huaihawttu JAC activist te kut a tuar zawk a ni, a ti.

Singjamei police sta­­­­­tion-a pungkhawm mi­­puite hi tualchhung MLA-in a khak hnuah an inbengdai a, buaina lian tham a chhuak zui lo. Mahse mipuite hi Ni­laini khan police station-ah hian an pungkhawm leh a, police te chuan a hnawh­darh nan tear gas leh silai mu ruak an kap puak bawk.