NPF-in ADC sorkar din thuai turin Governor a ngen

Naga People’s Front (NPF) central head­quar­ters chuan Manipur-a Au­tonomous District Council ṭhenkhata sor­kar thar lakluh a la nih loh chungchangah Ma­nipur sorkar chu a tikhawtlaituah puhin sorkar thar lakluhtir thuai turin Governor Syed Ahmed a ngen.

Manipur tlangram biala ADC parukah hian June 1 khan inthlan neih a ni a, June 10-ah result puan niin, ADC ṭhenkhatah chuan tun thlenga sorkar thar lakluh a la ni lo.

NPF chuan Gover­nor Ahmed hnena me­morandum a thehluh­ah Tamenglong leh Chandel district-a De­puty Commissioner te chu ADC pahnihah July 31, 2015 hmaa sorkar thar siamtir tur leh thil pawimawhte chinfeltir thuai turin an ngen.

ADC-a state sorkar aiawhtu tur ruatnaah pawh political party-a inhnamhnawihna nei lo an duh thu NPF chuan Governor an hriattir bawk a, Manipur (Hill Areas) District Council Act 1971, Section IV, Clause (3) tlawhchhan a, council member te rawn hnua state sorkar aiawh tur ruat an phut thu an tarlang bawk.

NPF chuan ADC pa­hniha sorkar thar lakluh a la nih loh leh tun thlenga state sorkarin a tikhawtlai chu Manipur-a rorellai Congress sorkarin tlang­mite a ngaihthah zia tilangtu a ni, a ti.

ADC-a sorkar thar lakluh hi June 17 hmaa tihfel vek tur a ni a, mahse state sorkar chuan tikhawtlai zelin, July 27 khan Hills Department chuan district pali-a Deputy Commissioner te chu July 31 emaw a hmaa ADC sorkar siam turin a hriattir chauh a ni, tiin NPF thuchhuak chuan a tarlang.