Dawithiam leh khawhring neia puhte venna tur bill Assam-in a pawmpui

Assam sorkar chuan dawi­thiam emaw khawhring neia puhte mipuiin an chilhlum ṭhin chu a khuahkhirhna dan siam tumin, cabinet meeting chuan Thawhlehni khan Prevention and Protection from Witch-hunting Bill 2015 a pawmpui.

Official chuan he thu hi sawiin, August 10-a assembly session neih hunah bill hi putluh a ni ang, a ti.

Social activist Dibyajyoti Saikia chuan dawithiama puhte chunga thihna thleng ṭhin chu pawi a tih thu sawiin, hemi chungchang kum nga chhung buaipui a ni ta chu lawmawm a tih loh thu a sawi.

"Kum 2008 leh 2013 inkar khan state chhungah dawithiam nia hriat mi 80 chuang thah an ni tawh a, hetianga inthahna thleng ṭhin ven nan hian dân khauh tak siam a ngai reng a ni. Dawithiama midang hriatna hi ngaihdan atthlak tak ni mah se, thingtlang khaw ṭhenkhatah chuan miin thil tenawm tak tihna remchangah an hmang ṭhin a ni. Khaw pakhatah chuan hmeichhe pakhat leh a chhungte chu dawithiama puhin, an in leh lote chhuhsak vek a ni," tiin social activist Saikia chuan a sawi.

Jharkhand, Bihar leh state dangte pawhin anti-witchhunt law an siam thu Saikia chuan a sawi bawk a, hei vang hian Assam pawhin a neih loh chhan tur a awm lo, a ti.

Socio-welfare organisation, Brothers hruaitu social activist Saikia hian dawithiam leh khawhring neia puhte venna tur dan siam phutin a hmain Dispur-ah nawrh a lo huaihawt tawh bawk.

Jagannath Barooah (JB) College, Jorhat-a political science department head Bolin Hazarika pawhin sorkar bill siam chu ṭha a tih thu sawiin, bill chu dâna siam thuai a duh thu a sawi a, miin dawithiam leh khawhring neia midang an puh avanga inthahna thleng ṭhin chu tihtawp thuai ṭha a tih thu a sawi.

Hetihlai hian advocate Rintu Goswa­mi chuan dawithiam leh khawhring neia puhte chunga tharum thawhna thleng ṭhin chungchangah dân neih ṭhat loh chu chhuanlam tlinga a hriat loh thu sawiin, police te'n pawikhawihna an chhui dan ṭhat loh avanga pawikhawihtute hrem loha chhuah zalen an ni ṭhin chu pawi a tih thu a sawi.

"Hetianga inthahna chung­changah pawikhawihtu tam zawk chu hrem lohin an chhuak a, hemi rual hian thilthleng mita hmutu, court hmaa thu hriatpuitua hman theih turte venhimna tur a awm lo bawk a, hei vang hian mita hmutute chuan an khuaa an kir hunah an khaw mipuite an hlauh avangin witness-a awm an duh ṭhin lo a ni," tiin advocate Goswami chuan a sawi.

Goswami chuan bill thar chu advocate zawng zawngin an thlawp vek thu sawiin, dawithiam leh khawhring neia inpuhna thubuai buaipui tura special police force siam ṭha a tih thu a sawi bawk. Bill thlawptu advocate te chuan bill an thlawp rualin he ngaihdan atthlak tak hi paihbo ṭul an tih thu leh school-ah nasa zawka naupangte zirtir pawimawh an tih thu a sawi bawk.