Assam sorkar kutah hel 64 inpe

Assam-ah Thawhṭanni kan helpawl pali aṭangin member 64 chu an ral­thuam kawlte nen sorkar kutah an inpe. 

Guwahati-a Srimanta Sankardev Kalakshetrea-a hun hmannaah helte hi an inpe a, he hun hi chief minister Sarbananda Sonowal pawhin a hman pui a ni. 

Sorkar kuta hel inpete hi  United Liberation Front of Asom (I) member 18, United People's Revolutionary mi leh sa 32, Dimasa National Liberation Army mi 13 leh People's Democratic Council of Kabri Longri (PDCK) member pakhat an ni. An zingah hian ULFA (I) deputy commander-in-chief leh PDCK self-styled commander-in-chief  pawh a tel. 

Helte hian ralthuam AK rifle 14, M-20 semi-automatic rifle pakhat, pistol 15, 9mm carbine pahnih, Lethod gun pakhat,  Lethod shell 20, radio handset eng emaw zat an pe lut tel a ni. 

Chief minister Sono­wal chuan kawng dik zawh duha hel ṭhahnem tham tak sorkar kuta a inpe chu lawmawm a tih thu sawiin, remna leh muanna a awm loh chuan hmasawnna a thleng thei lo tih a sawi. Tuna tharum thawh duhna lam kawng zawh mekte pawh kawng dik zawh a, ram dintharna tura tha thawh tura inpe zawk turin a ngen. 

Sorkar chuan hel inpete hi kum thum chhung thla khatah Rs 6,000 zel a pe dawn a,  kum thum  hnuah an khawsak chhoh dan  azirin one-time grant cheng nuai li ṭheuh a pe bawk ang. 

Kumin  January 23 khan helpawl hrang hrang pariata mi 64-te chu sorkar kutah an lo inpe tawh a, a hnu lawkah Myanmar-based National Democratic Front of Bodoland (S) member 968 te an inpe  leh bawk.