Manipur-ah IED kam hmuchhuak
Manipur security force-te chuan counter-insurgency operation an neihnaah improvised explosive device (IED) kam an hmuchhuak. Beihpui thlaknaah hian hel pahnih leh an ralthuamte an man tel bawk.
Union home minister Amit Shah chuan December 27 hian Manipur tlawh a tum a, hemi atan hian venhimna lam pawh inbuatsaihin, security force-te hian hmun hrang hrangah beihpui an thlak a ni.
IED hi Thawhṭanni khan Imphal East district-a Kongba Bazaar ah hmuh a ni a, kawng sirah kam a ni. Bomb disposal squad ko nghalin, anni hian an rawn sut a ni. Imphal East district SP Jogeshchandra Haobjijam chuan uluk zawka an dap kual tur thu a sawi.
Hmun danga beihpui thlaknaah police leh Assam Rifles team chuan United National Liberation Front (UNLF) helpawl member pakhat an man a, Imphal East district-ah Kanleipak Communist Party (KCP) operation commander an man bawk. Police-te chuan KCP commander kut aṭang hian 0.22 pistol leh a mu an man tel a ni.
Union minister Amit Shah hian Manipur a tlawh hunah chief minister N Biren Singh, governor Najma Heptulla leh state BJP hruaitute bakah MLA leh minister-te a hmu dawn a ni. A zin tum chhan hi sawichiang lo mah se, Indo-Naga peace talk neih meka a hmawr bawk a hnaih tawh avangin Manipur CM hi hemi chungchang hi sawipui a tum nia rin a ni.