Meghalaya-ah facilitation centre hawng

Meghlaya-a Umling leh Umroi airport-a  Facilitation Centres (FC) chu Thawhṭanni khan deputy chief minister Prestone Tynsong chuan a hawng. 

Facilitation centre (entry-exit point) hi state pawn lam aṭanga Meghalaya-a lut turte endikna tur a ni. He centre hi Tourism department-in a enkawl ang. 

Deputy CM Tynsong chu an state tlawh tumte chuan an kal hma emaw, facilitation centre-ah emaw an in register chuan an tan harsatna engmah a awm dawn lo tih a sawi. 

State Legislative Assembly-in inner line permit (ILP) system hman phutna resolution pass tawh mah se, sorkar laipui lamin pawmpuina a la pek loh avangin facilitation centre-te hi ILP hmanna tur zulzuiin hman  a ni ang. Centre siamna atan hian state sorkar chuan cheng vaibelchhe 2.85 a seng a ni. 

 Meghalaya state tlawh tumte chu a hmain online-a an lo in register lawk a ngai a, hetianga ti lote chuan state an luh dawnin Umling Facilitation Centre-ah hian an document-te keng telin an in ziah luh a ngai dawn a ni. 

Facilitation Centre siam chu state mipuite duhdan a ni tih sawiin, Dy CM chuan an state tlawhtute tan pawh ngaihngam leh him taka an awm theihna tur a ni, a ti. In register-te chu state chhunga an vahvelnaah pawh harsatna an neih loh tur thu a sawi. 

Dy CM chuan faci­litation centre dang hi Garo Hills-a Bajengdoda, Jaintia Hills-a Ratacherra leh Medipathar Railway Sation-ahte siam leh thuai tum ni tih a sawi. State pumah FC 18 siam a ni dawn, a ti.