Assam: Congress ṭhalaiten nawrh huaihawt

Assam Youth Congress chuan Inrinni khan Guwahati-a Six Mile-ah Youth Congress president Zubair Anam man a ni leh, Congress MP Rakibul Hussain beih a nih vanga lungawi loin nawrh an huaihawt.

Assam Pradesh Youth Congress president Zubair Anam hi Assam Pradesh Youth Congress Committee buatsaih nawrh huaihawtnaa tel tura ruahman a nih hma lawk khan police-te chuan house arrest in an dah a ni. Police-te thiltih hian Youth Congress worker-te ti lungawi loin, Panjabari-ah nawrh an huaihawt ta a ni. Party member lungawi lote chuan Six Mile leh Srimanta Sankaradeva Kalakshetra inkar kawngpui an dang a, lirthei tlan dan a tibuai nasa hle. Congress ṭhalaite chuan Anam-a house arrest a ni chu an dem hle a, chhuah zalen nghal turin an phut a ni.

Nawrh huaihawtte leh dan kengkawhtute inkarah buaina chhuakin, hei vang hian boruak a ṭha lo zual zel. Congress ṭhalaite chuan sorkar chu na takin an sawisel a, democracy dan ang taka nawrh huaihawt an tum venna atana tharum thawhna hman chu an duh lo tih an sawi.

Anam chuan MP Rakibul Hussain an beihna pawh democracy beihna tiin a sawisel a, Congress ṭhalaite hian MP beih a nih chungchangah Assam DGP hnenah memorandum an thehlut a ni. MP beih a nih mai bakah, amah venghim tur atana ruat police-te pawh beih an nih thu a sawi. Hemi chungchangah hian police-te chuan hma an la loa, DGP pawhin hma a la thei lo a nih chuan a nihna aṭanga bang turin a phut thu Anam chuan a sawi bawk a ni.