Irani-i'n AP-ah Apparel & Garment Making Center hawng

Union Textile Minister Smriti Zubin Irani chuan Thawhlehni khan Arunachal Pradesh-a Pasighat-ah puan tahna hmun, Apparel and Garment Making Center a hawng. He hun hi Chief Minister Pema Khandu, Union MoS (Home) Kiren Rijiju, MoS Ajay Tamta (Textile), state Textile, Handicrafts and Cooperation Minister Tapang Taloh leh Loksabha MP Ninong Ering-ten an hmanpui.

Irani chuan A&G making centre hawn a ni thei ta chu lawm-awm a tih thu sawiin, state mipuiten ṭangkai takin hmang se a duh thu a sawi. Textile ministry chuan North East Region Textile Promotion Scheme (NERTPS) hnuaiah center dang paruk hawn belh turin ruahmanna a siam a ni, a ti. Sorkar laipui chuan hmarchhak hmasawnna chu a ngai pawimawh tih sawiin, kawng hrang hrangin hmasawnna tur ruahmanna a siam mek a, hemi atan hian vaibelchhe 6000 vel sorkar laipui chuan a ruahman sak niin a sawi bawk. Irani hian State Chief Minister Khandu, MoS Rijiju, MP Ninong Ering leh State Textile minister Taloh-te chu textile sector-in hma a sawn zel theihna tur ngaihtuahin meeting a neihpui bawk.

Centre hawnna hmanpuitu CM Pema Khandu chuan, ṭhalai lehkha thiam zawng zawng tan sorkar hna beisei vek chi a ni lo tih sawiin, mahni intodelh leh chhungkaw chawm theihna tur khawpa puantah chu chawikan a ngai a ni, a ti. State chhung mai ni lo, hmun danga thawn chhuah tur siam chhuah theih a nih hunah chuan, mimal leh state tan hmasawnna chhenfakawm tak a ni thei dawn tih a sawi. A kaihhruai sorkar chuan agriculture, horticulture, tourism, hydropower sector leh a dangte tihchangtlun kawngah nasa takin hma a la mek tih a sawi bawk.

Centre hawnnaah hian MLA - Kaling Moyong, Lombo Tayeng, Kento Rina, Tatung Jamoh, Olom Panyang bakah DIGP, DC Isha Khosla leh SP Pranav Tayal-te pawh an tel a ni.