President’s Rule puang turin President thurawn ka pe lo : JP Rajkhowa

Arunachal Pradesh Governor ban tak J.P. Rajkhowa chuan Arunachal Pradesh-ah President’s Rule puan a nih theihna turin President hnenah thurawn a pe ngai lo tih Thawhlehni khan a sawi.

AP-ah hian kumin January 26 khan President’s Rule puan a ni a, mi tam tak chuan Governor chu President hnena rawtna thlenah puhin, President’s Rule puan a nih chhanah an puh a ni. Mahse Rajkhowa chuan President hnenah thurawn a pek loh thu sawiin, Prime Minister Narendra Modi leh Union Cabinet-te rawtna avang zawka President’s Rule chu puan a nih thu a sawi chhuak. President’s Rule puang tur hian state Governor-te rawtna chauh a tawk loh tih sawiin, Prime Minister leh Union Cabinet-te rawtna emaw pawmpuina a ngai niin a sawi bawk.

AP-ah hian Congress kaihhruai sorkara MLA eng emaw zat an hel avangin, sorkar chu rorel chhunzawm thei lo leh, session pawh a hun taka nei thei lo nia ngaiin, President chuan India danpui Article 356 tlawhchhanin President’s Rule a paung a ni.

President Pranab Mukherjee chuan September 12 khan Rajkhowa hi Arunachal Pradesh Governor a nihna aṭangin a ban a, Meghalaya Governor V. Shanmuganathan chu additional charge pek niin, state pahnih Governor hna chelh lailawk tura tih a ni. Shanmuganathan hian Thawhlehni khan Arunachal khawpui Itanagar a thleng tawh a, Nilaini aṭang khan a hna a chelh ṭan a ni.