Manipur-ah Kuki-te'n ‘Black Day’ hmang

Manipur-a Kuki-te chuan Thawhlehni khan kum 1992-1997 inkara Naga hel National Socialist Coun-cil of Nagaland - Isak-Mui-vah (NSCN-IM)-te'n an chi-pui mi 100 chuang an thahte hriatrengna pualin ‘Black Day’ urhsun takin an hmang.

Kuki Inpi Manipur (KIM)-te chuan September 13 chu, an chipuite rawng taka thah an nih duh lohna lan tir nan ‘Sahnit Ni’ emaw 'Black Day' tia hming vuahin, kumtin an hmang ṭhin a ni. 'Black Day' hi Kuki-te chenna hmun hrang hrangah urhsun taka hman niin, kawng zawh huaihawt a ni bawk. Kuki civil society chuan thuchhuah siamin, "Kan pi leh puten ram min hnutchhiat hmun ngei chuhpui a, NSCN-IM-te'n kan mi leh sa 100 chuang zet rawng taka an nunna an laksak hi pawi kan ti a, an dikna chanvo humhim sak ngei turin sorkar laipui kan phut a ni" an ti. Sorkar laipui chu Kuki-te harsatna tawh hrethiam duh lo leh, an dikna chanvo humhimn sak tura hma la chak tawk loah an puh bawk.

Naga hel pawl NSCN-IM-te hian, Kuki-te chu an chenna hmun chhuahsan turin an vau a, hun tiam pawh nghak chhuak zo loin an bei zui nia sawi a ni. Kuki chenna khua 360 vel zet tih chhiat leh hal a ni a, mi 1,00,000 chuang zetin himna zawngin an khua an chhuahsan a ni. He thil thleng rapthlak takah hian Kuki mi 100 chuang zet chu rawng taka thah an ni. He thil thleng duh lohna lantirna ni ‘Black Day’-ah hian, thi ta te dikna chanvo humhim sak tura ngenna leh an thil phut hrang hrang 60 vel zet chu Kuki-te chuan India sorkar-ah an thlen a ni.

Hetih lai hian NSCN (IM)-te hian kumin August thla khan India sorkar nen inremna an ziak a, inremna tluantling erawh a la awm lo nia tarlan a ni. ‘Black Day’ hman a nih dawn vang hian Manipur sorkar chuan venhimna khauh zawka kalpui turin rua-hmanna a lo siam lawk bawk.