India leh Bangladesh thawk dun dawn
India leh Bangladesh-te'n hel beihletna kawnga thawk dun turin inremna an siam tih Indian High Commissioner to Bangladesh Harsh Vardhan Shringla chuan Thawhṭanni khan Agartala-ah a sawi.
Shringla chuan, "India leh Bangladesh-te chuan helte do let tur hian kumin July khan New Delhi-ah Home Minister level meeting neiin, thawkdun turin inremna an lo siam tawh a ni" a ti. Shringla chuan, Bangladesh security force-te chuan July 1-a Dhaka-a helte pawikhawihna avanga mi 20 an thih hnu khan venhimna khauh zawkin an kalpui tih sawiin, ramria hel dap chhuah hna pawh a thawk nghal a ni, a ti. Ram pahnihten hel do let kawnga chak zawka hma la tura inremna an siam thei ta chu lawmawm a tih thu a sawi bawk.
Shringla hian Thawhṭanni khan Agartala a thleng a, ni li a cham ang. A cham chhung hian India leh Bangladesh inrinna, Tripura ram chhung km 856-a thui border chu a hmunah kalin a enfiah ang. Tripura Chief Minister Manik Sarkar, Chief Secretary Yashpal Singh leh sorkar mi pawimawh dangte ramri chungchang a sawipui dawn bawk. Shringla chuan ram pahnih ten thawk dun tura inremna an siam tak avang hian hun eng emaw chen India-Bangladesh project khaihlak tawh pawh chhunzawm leh beisei a ni, a ti. Project khaihlak zingah hian Agartala railway station leh Bangladesh-a Akhaura railway station thlunzawmte, lei hmanga inkalpawhna tur dawh pawh a tel a ni.
Bangladesh leh India inrinna hi a thui hle a, West Bengal state huamchhungah km 2216 zet niin, Tripura (856 km), Meghalaya (443 km), Mizoram (318 km) leh Assam (263 km) te a ni. A vaia a thui zawng hi km 4,096 zet a tling a ni.