Meghalaya sorkar rintawk lohna motion pu lut

Maghalaya-a opposition party-te'n Mukul Sangma kaihhruai Congress sorkar rintawk lohna 'no-confidence motion' put luh an dilna chu Nilaini khan ngaihtuah a ni a, Assembly-ah put luh remtih a ni. Nimin chawhnu khan motion hi Assembly-ah putluh nghal a ni.

Thawhṭanni khan opposition MLA pathum - James Sangma (National People’s Party), Ardent Miller Basaiawmoit (Hill State People’s Democratic Party) leh Jemino Mawthoh (United Democratic Party)-te chuan sorkar rin tawk lohna motion put luh dilna chu Assembly Secretary hnenah an thehlut a ni. No-confidence motion hi opposition member 14 te chuan an thlawp a, Assembly-a put luh a nih theih nan hian member 10 talin an thlawp a ngai. United Democratic Party MLA pariat, Hill State People’s Democratic Party MLA pali leh National People’s Party MLA pahnihte chuan motion hi an thlawp a ni.

Chief Minister Mukul Sangma chuan a kaihhruai sorkar rintawk lohna motion put luh a ni chu thil thar a nih tawh loh thu sawiin, buaina tur a awm lo, a ti.

Independent MLA 11 te chuan a kaihhruai sorkar an thlawp niin a sawi bawk. Hetihlai hian Opposition leader Donkupar Roy chuan, "Sorkar rintawk lohna motion put luh a nih hian Congress MLA helte a fuih phur dawn a ni" tiin, Congresss MLA zingah lungawi lo an awm thu a sawi.

Meghalaya Assembly-ah hian member 60 an awm a, rorel lai Meghalaya United Alliance chuan MLA 30 neiin, anmahni thlawptu Independent MLA 11 leh Nationalist Congress Party MLA pahnih an awm a ni. Hetihlai hian Assembly speaker Mondal-a ban a nih dawn leh dawn loh chu vawiin hian ngaihtuah a ni bawk ang.