India rama state fai ber Sikkim

Ministry of drinking water and sanitation-in “Swachh Survekshan Gramin 2016” report a tih chhuah thar berah, Sikkim chu India rama state fai berah thlan a ni.

State fai thlanna hi India rama state 26-ah kalpui a ni a, a bikin rural area-ah kalpui a ni. Sikkim state-a district pali te chu fai tehnaah hian a sang zingah lang phakin, a pum puiah pakhatna a hauh theih phah a ni. Sikkim hian tehna hrang hrangah 98.2% hmu phakin, vantlang leh chhungkaw tin ten inthiarna mumal tak an neih leh neih loh tehna bikah chuan 100% a hmu a ni.

Ministry of Drinking Water and Sani­tation-in report a tih chhuahah hian West Sikkim district (96.4% ), East Sikkim district (93.7), South Sikkim district (93.0) leh North Sikkim district-te chuan 90.7% an hmu phak a ni. Sikkim-a chhungkaw 6,10,577-te chuan inthiarna mumal tak an nei vek nia tarlan a nih bakah, vantlang inthiarna an neih ṭhat dan tehnaah pawh 98.2% a tling phak.

Chief Minister Pawan Chamling chuan kum 1999 daih tawh khan 'community-led sanitation campaign' chu a lo hawng tawh a, hei hian rah ṭha a chhuah niah ngaih a ni. Sikkim ram zau zawng hi sq km 7,096 a ni a, khawpui aṭanga hmun kilkhawr ber thlengin faina leh hriselna kawngah 'community-led sanitation campaign' hi mumal taka kalpui a ni tih a ti chiang hle niin Chamling chuan a sawi.

Sikkim-ah hian khaw 446 awmin, district pali a awm a, sub division 16-ah
ṭhen an ni. Ministry of Drinking Water and Sanitation thuchhuah chuan, Sikkim state-in faina kawngah a hnathawh ṭhat avangin, 27th May 2016-a 65thPlenary session of the North East Council, Shillong, Meghalaya-a neih a nih khan Minister Sh Pawan Chamling hnenah Prime Minister Narender Modi chuan award a lo hlan tawh tih an tarlang. Hei bakah hian national awards for Swacch Bharat Mission award a dawng tawh a, kumina New Delhi-a Civil Services Day hman a nih khan 'Prime Minister award for excellence in public administration' a lo dawng tawh bawk a ni.

State sorkar chuan chungkaw 1,05,311 tan inthiarna a siam sak tawh a, school 2,682-ah mipa leh hmeichhe tan a hrana inthiarna tur mumal tak a siam sak tawh bawk. Vantlang, chhungkua, school, agan­wadi leh institution-te tana a thawh ṭhat avang hian President hlui Pratibha Devisingh Patil chuan 'Nirmal Rajya Award' chu state Chief Minister Pawan Chamling hnenah December 8, 2008 khan a lo hlan tawh bawk.

Ministry of Drinking water and sanitation report-in a tarlan dan chuan West Sikkim district chuan ram pumah district fai ber pahnihna a hauh phak. East district chuan palina hauh phak ve bawkin, South district chu parukna a ni a, North Sikkim district chuan pariatna a hauh phak bawk.

CM Sh Pawan Chamling chuan Panchayati Raj Act siam a nih thu sawiin, PRI member-te chuan inthiarna mumal tak an neih vek a ngai tih a sawi.