Tripura-ah Tribal Party-te'n thawm nei thar leh

Tripura-a tribal party pahnih – Indigenous Nationalist Party of Tripura (INPT) leh Indigenous People’s Front of Tripura (IPFT)-te chuan state hran pek phûtin sorkar laipui an kar leh mek a, an thil phût nawr nan ‘Delhi Abhiyan’ (march to Delhi) huaihawt an tum.

IPFT member ṭhenkhat chuan nimin lam khan New Delhi an pan a, Uunion Home Minister Rajnath Singh, Tribal Affairs minister Jual Oram leh mi pawimawh dangte an hmu ang. IPFT President Narendra Chandra Debbarma chuan Union Home Minister chu August 23-a Agartala-a tharum thawhna thleng chungchang an sawipui tur thu a sawi. IPFT acting general secretary Maybar Kumar Jamatia chuan ‘Delhi Abhiyan’ neih a nih hunah sorkar laipuiah memorandum an thehlut dawn tih a sawi bawk.

INPT leh IPFT-te hian Tripura Tribal Areas Autono-mous District Council (TTAADC) chu thuneihna sang zawk pe turin an phût a, tribal-te himna turin inner-line permit hman an phût bawk. Hei bakah hian tribal language - Kokborok chu 8th Schedule of the Constitution-ah telh an phût a, Tripura assembly member 60 awmnaah, seat 50% hauhsak an phût bawk. Tribal-te chu politics, economy leh an culture-te humhim sak an nih theihna turin TTAADC chu kum 1987 khan Sixth Schedule of the Constitution tlawhchhana din a ni. Kumin December kartir lam khian New Delhi-ah state pek phûtin INPT leh IPFT-te hian darkar ruk awh 'sit-in-demonstration' neih an tum a ni.

Tripura hian nakkumah inthlan a hmachhawn dawn a, hemi hi remchangah hmangin tribal party-te chuan state hran pek phûtin sorkar laipui an kar nia tarlan a ni.