AP-ah Congress MLA 42-in People's Party an zawm
Arunachal Padesh-a Congress MLA 42 leh Independent MLA pahnih te chuan People's Party of Arunachal (PPA) an zawm. PPA zawmtu zingah hian Chief Minister Pema Khandu pawh a tel.
PPA hi regional party niin, BJP kaihhruaia din Congress party tel lohna North East Democratic Alliance (NEDA) thlawptu a ni.
Chief Minister office thuchhuah chuan, Arunachal Pradesh sorkar chu sorkar laipui aṭanga ṭanpuina sum a hmuha a innghah avangin Congress party lo zawm chu a ṭangkai lo hle niin a sawi. MoS Home Kiran Rijiju chuan MLA-te chuan Congress-a awm zui zel chu an duh tawh lo tih a sawi. MLA 42-in Congress an chhuahsan tak avang hian Congress chuan a sorkarna state a hloh leh dawn.
Arunachal Pradesh-ah hian tun hnai kum 10 chhungin sorkar pariat a ding hman a, kumin bikah sorkar pathum a ding tawh bawk. Hei hian politics-ah buaina awm tih chiang takin a tarlang a, a hmabak a ko hle. Hetih lai hian PPA chuan BJP a thawhpui dawn em tih a la puang lo a, party malin sorkarna a siam thei bawk. Arunachal-ah hian BJP chuan MLA 11 a nei mek. Assembly member 60 awmnaah hian Congress chuan MLA 47 neiin, MLA 42-te'n PPA an zawm tak avang hian Congress sorkar a ding tawh dawn lo tih a chiang tawh. Hetih lai hian Congress MLA pahnih chuan an hma lam hun an la tichiang lo thung a, anni pawh hi chuak tur anga sawi an ni.
Nabam Tuki-a kaihhruai Congress sorkar chu MLA helte avangin paihthlak a ni a, January 2016 khan state-ah President's rule puan a ni. Congress MLA hel hruaitu Kalikho Pul leh a thurualpuite chuan sorkarna siamin, thla reilo te chhung chief minister a ni zui. He mi hnu hian Supreme Court thupekin, Arunchal-ah hian July 2016 khan Congress sorkar din leh a ni a, chief minister Kalikho Pul chu paihthlak niin, Congress hruaitu Pema Khandu chu Chief Minister atan lakluh a ni. CM hlui Kalikho Pul hi thla hmasa lawk khan a room-ah inawkhluma hmuh a ni. Tunah Congress MLA 42-te'n People's Party of Arunachal (PPA) an zawm leh tak avangin, AP ah hian sorkar thar a piang leh thuai dawn a ni.