Thla nga chhungin Manipur tan vaibelchhe 100 pek chhuah a ni : DoNER Minister

Union Minister of State (Independent Charge) for Development of North Eastern Region (DoNER) Dr Jitendra Singh chuan, sorkar kum kal mekah Manipur-a hmasawnna hna thawhna turin DoNER ministry hnuaiah cheng vaibelchhe 100 pek chhuah a ni tawh tih a sawi.

Sum pek chhuah tawh zinga vaibelchhe 28.47 chu Non Lapsable Central Pool of Resources (NLCPR) a nih thu sawiin, North Eastern Council (NEC) project atan vaibelchhe 75 pek chhuah tawh a ni, a ti. Heng sum te hi thla nga chhunga pek chhuah a nih thu a sawi.

Dr Jitendra Singh kaihhruaina hian Nilaini khan Ministry of DoNER meeting neih a ni. Singh chuan hmarchhak state zingah Manipur chu liberal fund leh central ministry hrang hrang chhawr berte zinga mi a nih thu a sawi. Tunah hian Imphal-Moreh leh Senapati-Imphal inkalpawhna tur four-lane siam turin ruahmanna kalpui mek a nih thu Singh chuan a sawi bawk.

Union minister chuan sorkar laipuiin Manipur-ah Sports University din a remti tawh tih sawiin, ram neitute hnena zángnadawmna pek chungchangah harsatna a awm avangin, tihkhawtlai a ni, a ti. Hei bakah hian hmarchhak huam chhunga district headquarter 103-te chu motor kawngpui (two-lane)-a thlunzawm vek tum a nih, a ti.

Nilainia meeting-ah hian DoNER Secretary Naveen Verma leh senior officer eng emaw zat an tel a ni.