Manipur-ah hnehna kan chang dawn : Shah

Bharatiya Janata Party (BJP) Pres-i-dent Amit Shah chuan Manipur assembly election-ah Congress sorkar chu paih thlakin a awm dawn tih sawiin, BJP chuan hnehna a chang dawn a ni, a ti.

Nilaini khan Hafta Kang-jei-bung-ah Manipur state BJP chuan vantlang inkhawm a buatsaih a, BJP president Amit Shah chuan a hmanpui. Shah chuan,"Congress sorkar chu hna thawk ṭha tawk lo leh eirukna laka fihlim lo a ni. Vawiina helaia lo pungkhawm te hian min thlamuan hle a, BJP chuan huang a zauh zel a ni. Nakuma Manipur assembly election lo awm turah khian BJP chuan hnehna a chang dawn a ni" a ti. Manipur Chief Minister Okram Ibobi leh Congress hun laia Assam Chief Minister Tarun Gogoi chu sum duh leh hmasawnna hna thawhna tur sum pumbilh ṭhinah a puh.

Shah chuan Congress sorkar chuan hmasawnna tak tak a thlen lo nia sawiin, mipuite pawhin rinna an nghat ngam tawh lo a ni, a ti. Prime Minister Narendra Modi chuan hmarchhak tihhmasawnna chu a thupui ber pakhat a nih thu leh, union minister-te chu hmarchhak bial a tam thei ang bera tlawh tura hriattir thu a sawi. Hei bakah hian hmarchhak state-te chu
ṭhenawm ram te nena inzawmna ṭha an neih theihna turin inkalpawhna ngaihpawimawh sak an ni, a ti bawk.

Shah hian ni hnih chamin Manipur hi a tlawh a, HRD Minister Prakash Javedkar leh Assam Finance Minister Himanta Bishwa Sarma-te'n an ṭawiawm.