AP-ah NDA sorkar a ding : Himanta Biswa Sarma

North East Democratic Alliance (NEDA) convener Himanta Biswa Sarma chuan Arunachal Pradesh-ah National Democratic Alliance (NDA) sorkar a ding niin Zirtawpni khan a sawi.

Arunachal-ah hian Congress chu MLA 44 neiin rorel lai a ni. Mahse MLA 43-te chuan Chief Minister Pema Khandu hoin kar kalta Zirtawpni khan regional party, Peoples Party of Arunachal (PPA) an zawm. Congress MLA-te hian Congress vice president Rahul Gandhi-a ngenna hnawlin, PPA hi an zawm ta nia sawi a ni. Assam minister leh BJP hruaitu ni bawk Sarma chuan, "PPA chu NEDA thlawptu leh a peng pakhat a ni a, BJP hnuaia awm niin, Arunachal Pradesh-ah hian BJP kaihhruai NDA sorkar chu a ding ta a ni. Arunachal chu Congress party lak aṭangin a fihlim ta" tiin a sawi. Arunachal chu a bulṭanna a ni tiin, hmarchhak state-ah huang zauh zel an tum thu a sawi.

BJP MLA 11-te chuan Chief Minister Pema Khandu kaihhruai sorkar chu an thlawp tih Sarma chuan sawiin, Khandu nen inbiakna an neih thu leh, mipuiin Congress an thlawp loh thu a sawi. Congress MLA 43-te chuan PPA hi zawmin, an zingah hian chief minister leh assembly speaker pawh an tel a, chief minister hlui Nabam Tuki erawh a tel lo thung. CM Pema Khandu chuan thuthar thehdarhtute hmaah, "Peoples Party of Arunachal (PPA) hi regional party a ni a, hei hian kawng tam takah ṭhatna a nei a ni. State sorkar tan pawh chak zawka hmalak a awlsam dawn a, kan lo sawi fo tawh ṭhin 'Team Arunachal' tak tak chu kan hmu thuai ang" tiin, Congress party an chhuahsan chhan a sawi. Central-a Congress nena inzawmna an neih chuan awmzia a nei thui lo tih sawiin, chhuahsan tura thutlukna an siam tak thu a sawi. Mipuite tana thawh chu a kaihhruai sorkar ngaih pawimawh ber a nih thu sawiin, thawhhona ṭha nei zel turin mipui a sawm.

Khandu hi Arunachal CM pakuana niin, July 17 khan rinawmna thu tiam tira lakluh a ni a, India rama chief minister naupang ber a ni. Arunachal Pradesh-ah hian NDA sorkar din a ni ngei em tih erawh official-a puan a la ni lo thung.