Eptuten Meghalaya Speaker laka resolution hnukkir

Meghalaya-a eptu party-te'n autumn session tawpnia Assembly Speaker Abu Taher Mondal bang tura phutna resolution an pass chu, kar kalata Zirtawpni khan ngaihtuah tura tih a ni a, mahse eptu lamte hi an inhnukdawk leh.

Mondal chuan National People’s Party (NPP) MLA James Sangma hnen aṭanga lehkha a dawn thu sawiin, resolution an sût thu a ziak a ni, a ti. Hill State People’s Demo­cratic Party MLA Ardent Miller Basaiawmoit chuan Congress kaihhruai sorkar rintawk lohna 'no-confidence motion' an put luh chu, vote hmanga chin fel a nih hmain a lo hnukkir tawh bawk. Motion hi debate neih a nih hnuah hnuhkir leh a nia, Meghalaya assembly-a hetiang thil a thlen vawi khatna a ni.

Eptu hruaitu Donkupar Roy chuan, “Congress sorkar rintawk lohna motion chu House-ah putluh a ni a, nimahsela chhan hrang hrang vangin hnuhkir leh a ni. Assembly speaker Modal chungchang ngaihtuah tura resolution pass pawh ngun taka kan ngaihtuah hnuah kan hnukkir leh ta a ni" a ti.

September 9 khan James Sang­ma-a'n assembly speaker Mondal chu a hna hlen zo lo leh a tihtur titawk loah puh a, a chungchang Sep­tember-a ngaihtuah a nih theih nana resolution a put luh chu assembly chuan a lo pawm sak tawh a ni.

Chief Minister Mukul Sangma chuan debate hlawhtling tak an neih thu sawiin, opposition party-te chuan debate neih a nih hnuah speaker Modal-a laka resolution an putluh pawh an sût leh leh ta a ni, a ti. Sangma chuan debate hlawhtling taka neih a ni chu lawmawm a tih thu sawiin, motion leh resolution-te opposition lamin an hnukkir chu lawmawm a tih thu a sawi.

Speaker Mondal pawhin House chungah boruak ṭha tak a awm chhoh zel theih a beisei tih sawiin, House member-te chu thawhpuiah a sawm. Modal chuan member-te chu a mal mala titi pui a tum thu sawiin, a hna a tlin tawk lo nia puhna te chu ngaihthlak a inhuam thu leh, insiam ṭhat a ṭul a nih pawhin insiamṭhat a tum tur thu a sawi.

Meghalaya hian Assembly member 60 a nei mek a, rorel lai Meghalaya United Alliance-ah hian Congress chuan MLA 29 neiin, Nationalist Congress Party MLA pahnih, Independent MLA 11 leh North East Socialist Democratic Party MLA pakhat an awm a ni. Eptu lamah United Democratic Party chuan MLA pariat a nei a, Nationalist People’s Party (2), Hill State People’s Democratic Party (4) leh Independent MAL pahnihte an awm bawk.