Manipur-ah Prepaid Power Meter thar

Sorkar laipui leh Manipur sorkar ṭangkawp chuan Manipur-a hman tur Prepaid Power Meter thar an bun.

Sorkar thuchhuah chuan Prepaid Power Meter chu power sector lama hmalakna pakhat a nih thu a tarlang. A thawh khatnaah hian pre-paid electronic energy meter hi nuai 2.2 vel bun a ni a, hei hian consumer nuai 2.4 vel a huam thei dawn a ni. Manipur-ah hian electricity consumer mi 2, 80,783 an awm a, heng zinga 2, 64,101 chu domestic consumer an ni. He system thar hian chhiah lak kawngah nasa takin a pui thei dawn a ni.

Manipur State Power Distribution Company Limited (MSPDCL) Executive Director L. Priyokumar Singh chuan, infrastructure lamah harsatna an tawh ṭhin avangin, chhiah lak thlengin a nghawng tih a sawi a, meter box, meter reading leh bill siam kawngah te harsatna a awm ṭhin a ni, a ti. Heng harsatnate hi pre-paid electronic energy meter hman a nih vek hunah chuan nasa takin a kiam thei dawn niin a sawi.

Hmarchhak hian power mega watt 2,054 vel a hmang mek a, Manipur bik hian mega watt 182 vel a hmang a ni. Project thar hian Imphal, Lamsang, Wangoi, Wangjing, Yairipok, Sugnu, Heirok, Jiribam, Tamenglong, Ukhrul, Kangpokpi lehSekmai-te a huam dawn a ni.