JAC-RRCV-te'n Manipur Governor hnenah ngenna thlen

Manipur Ukhrul district-a Chadong khua chu Mapithel Dam/ Thoubal Multi-Purpose project siam mekin a chim a, an harsatna sutkian a nih theihna turin khaw mipuite chuan state Governor Dr Najma Heptulla chu hma la turin an ngen.

Thoubal lui hi tui lak atan te, power siam chhuah nan leh Inphal khawpui chawmna atan bakah a lui mawng lama awmte tuilian laka an him theihna turin khuah a ni. He project hi Planning Commission hnuaiah May, 1980 khan Central Water Commission hriatpuinain bul ṭan a lo ni tawh a ni. Hetih lai hian Joint Action Committee on Rehabilitation and Resettlement of Chadong Village (JAC-RRCV)-te chuan tuikhuah hian Chadong khua chu June, 2015 khan tuiin a chim pil vek tawh tih sawiin, sangha dil leh thlai chinna hmun ṭhenkhat pawh a hma kum daih tawh aṭangin a chim tawh niin an sawi. Kum 2014 aṭang khan himna zawngin an khaw ṭhenawm leh hmun dangah an inthiar chhuak tih sawiin, an chenna tur leh an khawsakna hmun turte ngaihtuah sak an ni loh thu an sawi.

JAC-RRCV thuchhuah chuan, “Multi-Purpose project chu Chadong mai bakah a bul hnaia khaw awm tan a him tawk lo hle, hun lo la kal zel tur ngaihtuahin hma bak a thim hle a ni" tiin, an harsatna sukiang tura hma la turin sorkar an ngen a ni.

He Multi-Purpose project hi kumin September thla chhung hian hawn hman tum a ni a, hetih lai hian tuilianin a chim Chadong khua sawn chhuahna tura sorkarin hmun a ruahman sak chu ngaihthah a nih thu tarlan a ni. In sakna bungrua phur lut turin kawngpui a ṭha tawk lo a, electricity leh water supply a awm lo nia sawi a ni. Hemi chungchangah hian JAC-RRCV-te chuan Manipur Governor Dr Najma Heptulla hnenah memorandum thehlutin, hma lakpui turin an ngen a ni. Governor hnenah hian, khaw mipuite chuan Mapithel Dam atan hian an in leh lo an chan tih hrilhin, state hmasawn nan an hlan niin an sawi. Mahse sorkar lam aṭanga ruahmanna mumal a awm loh avangin tunah chuan, an ram ngeiah refugee-ah an chang chho mek niin an sawi a ni.

JAC-RRCV-te'n Governor hnena thil phut an thlente-

ω Chadong khua chu ‘Mapithel Dam affected village'-ah puan

ω Chadong chu model village-ah siam a, khualzinte him thei tura cheibawl

ω Khaw mite tana state leh sorkar laipui aṭanga scheme awm theite ngaihtuah sak

ω Water Rights leh Fishing Rights pek

ω Kum 10 chhung Free electricity pek

ω Church Guest House, Community Hall, Youth Club Hall, Student Union Office leh a dang din

ω Zángnadawmna pek leh Special Package siamsak bakah kawngpui siam te a tel a ni