Tripura sorkarin chhiah awl rute inhriattir turin ngen

Tripura Income Tax Department chuan September 30 ral hma ngeiin Income Declaration Scheme (IDS) hnuaiah chhiah awl ru te chu sorkar-ah inhriattir turin a ngen.

Principal Commissioner of Income Tax (PCIT) L.C. Joshi Ranee chuan hun tiam chhunga inhriattir lo te chu man chhuah an nih chuan hremna pek an nih tur thu a sawi. IDS hi kumin June aṭang khan sorkar laipui chuan a kalpui ṭan a, chhial awl ru emaw chhiah pe ṭha lo te zawn chhuahna a ni. He scheme hnuaiah hian chhiah pe ṭha lo leh an thil neih ṭhenkhat aṭanga chhiah awl rute chu sorkarah inhriattir tura tih an ni a, hun tiam chhunga tihlawhtling lo te chu hrem theih an ni.

Joint Commissioner of Income Tax (JCIT) Syamal Datta chuan IDS hnuaiah hian chhiah awl ru man chhuah an awm a nih chuan, chhiah an pek tur chu 100% aṭangin 300%-ah tihsan theih a nih bakah, kum thum aṭanga kum sarih thleng jail tan theihna a ni, a ti. Chhiah awl rute'n chhiah an pek leh hun chhung tur hi pawhsei sak an ni a, nakum September 30 thleng hun pek an ni. JCIT Syamal Datta chuan Tripura-ah hian chhiah pe ṭhin chu mi 43,000 vel an nih thu sawiin, a pe tur dik tak erawh mi nuai khat vel an tlin thu a sawi. Chhiah pe lo awm chu Income Declaration Scheme (IDS) hnuaiah hian a inpuang tur a ni a, a thil neihte sorkar a hriattir ngei tur a ni.