Manipur CM-in sangha khawitute hnenah Rs vbc 1.8 pe

Manipur chief minister N Biren Singh chuan Thawhlehni khan an state chhunga sangha khawitu mi 900 te ṭanpuina tur cheng vaibelchhe 1.8 a pe.

Sangha khawitute hnena ṭanpuina hi sorkar laipui hmalakna, RKVY-RAFTAAR  hnuaia Paddy and Pisciculture scheme hmanga pek an ni. 

Hill district 10-a sangha khawitu mi 900 hnenah Rs 15,000 ṭheuhin chhawmdawlna hi pek a ni. Dirctorate of Fisheries-in Chief Minister Secretariat-a hun a buatsaihah pawisa hi sem a ni. 

He scheme in a tum ber chu sangha khawitute sum lakluh tihpun te, an sangha khawina hmun tihchangtlun te, feeding channel siam te a ni. 

Manipur sorkar chuan kum khatah hmun dang atangin sangha cheng vaibelchhe 400 man vel an lalut thin tih a hriat hnuin, state chhunga sangha khawitute puihna tur hi a duang ta a ni. Inkhawm buatsaihah thu a sawiah, CM chuan an state-in kum khatah sangha a mamawh MT52,000 atangin state chhunga thar chhuah chu MT 27,000 chauh a tlin thu a sawi. Hei vang hian state chhung miten sangha tam zawk an thar chhuah theihna turin sorkar chuan ruahmanna hi a siam a, sangha khawitute tan loan, Rs nuai 2-7 inkar thleng an lak theih dan tur pawh a ruahmansak bawk. CM chuan sorkar hmalakna avang hian state chhunga sangha thar chhuah hi MT 32,600 ah a pung chho tawh a ni, a ti.