Inkalpawhna ngaih pawimawh ber a ngai: Nagaland CM

Nagaland Chief Minister T R Zeliang chuan hmarchhak hma-sawnna turin inkal-pawhna, road, railway, airport leh inland water-way-te chu ngaih pawimawh hmasak ber a ngai tih a sawi.

North East Council (NEC) committee on connectivity meeting hmasa ber chu kar kal-ta Zirtawpni khan Rhododendron hall, Chumukedima-ah neih a ni a, Zeliang hi committee chairman a ni. Zeliang chuan NEC chu inkalpawhna siam kawngah policy mumal tak nei turin a duh tih a sawi a, “regional planning body" chu "regional planning and development body”-ah thlak a ngai tih a sawi.

Nagaland CM chuan sorkar laipuiin Act East Policy a kalpui chu thiam taka chhawr ṭangkai a ngai a ni a ti a, national road development prog-ramme, SARDP-NE, PMGSY leh national programme for railways and air connectivity-te chu hmarchhak tana ṭangkai tak a ni, a ti. Nagaland Rajya Sabha MP K G Kenye chuan hmarchhak hmasawn nana NEC leh DoNER-te hmalakna chu fakawm a tih thu a sawi bawk.

Meeting-ah hian mi pawimawh tak tak, MP - Ninong Ering leh Gau-rav Gogoi te, Nagaland parliamentary secretary for planning Neiba Kronu, union secretary of DoNER Naveen Verma, NEC secretary Ram Muivah, Ranchi university aiawh, JNU, Manipur university, NEC official bakah Airports Authority of India
aṭangin mi eng emaw zat an tel a ni.