Tripura: Multi-level parking facility siam hna thawk mek

Tripura khawpui, Agartala-ah motor pung zel avanga traffic tawt lutuk tih ziaawmna atan Rs vbc 200 sengin multi-level parking facility siam hna thawh mek a ni.

Agartala Municipal Corporation mayor, Dipak Kumar chuan he project chungchang hi sawiin, hmarchhak biala a hmasa ber tur a nih thu a sawi. Multi-level parking siamna atan hian Rs vbc 200 vel seng tura ruahman a ni a, chhawng 11-a sanga siam an tum tih a sawi. Ground floor leh chhawng khatnaah chuan car leh bike 400 vel an leng thei dawn a, a hma lamah motor 80 vel an ding thei dawn bawk niin a sawi. A building pumpuiah hian a rualin motor 400 chuang awm thei tura ruahman a ni, a ti.

He project hmang vek hian multi-complex shopping mall siam tum a ni bawk tih mayor Kumar chuan a sawi. Public-Private Partnership (PPP) model hmanga thawk a ni dawn a, hmarchhak biala shopping mall lian ber siam a tum tih a sawi.

Multi-level parking facility project hi kum 2023, September 4 aṭang khan thawh ṭan a ni tawh a, kum 2026-ah zawhfel tum a ni. An siamna hmun hi square feet 37,800-a zau a ni. Thawh zawh a nih hunah chuan khawpui chhunga traffic tawt a tih ziaawm bakah, economy lam thleng pawhin nghawng ṭha tak a neih beisei a ni.