Ni 60 hnuah Tarun Gogoi damdawi-in aṭangin chhuak

Covid-19 a kai avanga enkawl, Assam chief minister hlui Tarun Gogoi, kum 85 mi chu damdawi-inah ni 60 chuang enkawl a nih hnuah Pathianni khan chhuah tir a ni ta. 

Health minister Himanta Biswa Sarma chuan Guwahati Medical College and Hospital (GMCH) aṭangin Gogoi hi Pathianni khan a chhuak tih sawiin, in lamah medical college-a doctor-te enpuina hnuaiah enkawl chhunzawm zel a nih tur thu a sawi. 

Gogoi hi August 25 khan Covid-19 a kai tih hriat a ni a, a dinhmun a ṭhat loh avangin plasma therapy hmanga enkawl a ni. Damdawi-ina a awm chhung hian amah buaipui bik turin Pulmonary Medicine Department hotu, Jogesh Sarma kaihhruai doctor pakua awmna team siam a ni. Anni hian a chhuah hnuah pawh in lama a inenkawlnaah an vil zui zel ang. 

Assam hi hmarchhak state zingah Covid-19 kai leh thihpui tamna ber a la ni chhunzawm zel. Hri kai hmuh chhuah tawh hi mi 2,03,967 niin, an zinga 1,82,791 chu an dam tawh. Hripui thihpui hi mi 906 an awm tawh bawk. 

Health Department official-te chuan hri kai hmuh chhuah thar zat hi a tlahniam tawh tih sawiin, positi­vity rate hi 1.4% a ni tawh a; enkawl dam, recovery rate hi 89.61% a tling tawh thung. Hripui thihpui zat pawh tla­hniamin, fatality rate hi 0.44% a ni.