KNP-a buaina chhuakah mi pahnih thi

Assam sorkar, Nagaon district administration leh security force-te chuan Thawhṭanni khan Kaziranga National Park huam chhunga Banderdubi leh Deochurchang khua-a chengte nawr chhuah tumin beihpui an thlak a, buaina chhuakah mi pahnih an thih bakah hliam eng emaw zat an awm.

Gauhati High Court chuan Banderdubi leh Deochurchang khuate chu dan kalha din a nih thu a lo sawi tawh a ni. Hei vang hian Assam sorkar chuan hma la zuiin, heng khaw pahniha awmte hi chhuak turin a hriattir a, mahse khaw mipuite chuan an phu ang tawk zángnadawmna pek an nih phawt loh chuan chhuah an tum loh thu an sawi.

Court thupek bawhzuiin, Thawhṭanni khan heng khuaa cheng chungkaw 300 chuangte chu nawr chhuah tumin state sorkar chuan hma a la a, khaw mipuite chuan hei hi duh loin, lungawi lohna an lantir. Khaw mipuite chuan eviction team-te chu lo dan tumin an bei a, security force-te chuan mipui pungkhawmte chu tear gas hmangin an hnawtdarh.

Security leh mipui inkarah hian tharum thawhna theng zuiin, mi pahnihin nunna an chan. Heng mi pahnih - Anjuma Khatun leh Fakhruddin-te hi police-te silai hmehpuah vanga thi nia sawi a ni a, hei hi police lam chuan an pha thung.

Assam District General of Police (DGP) Mukesh Sahay chuan, "Kaziranga National Park huam chhunga cheng chhungkuate hi Court thupek anga chhuak tura tih an ni a, nimahsela an chhuah duh loh avangin sorkar leh district administration-te chuan hma lain, tun hi kan thleng ta a ni. State sorkar chuan he hmun hi chhuahsan turin a lo hriattir tawh a, thupek an zawm loh avangin security force-te nen ṭangkawpin hma lak a ni ta a ni" a ti. Heng laia chengte hian zángnadawmna pek an phût avangin hun rei tak harsatna an siam tawh tih a sawi. Sahay chuan police silai hmehpuah avanga thi nia sawi awm chu finfiah a nih tur thu sawiin, post mortem an ni a, result nghah mek a ni, a ti.

Eviction drive kalpui tur hian Guwahati High Court chuan thupek a chhuah a, Golaghat, Sonitpur leh Nagaon district Deputy Commissioner-te pawh hriattir an ni. Assam sorkar chuan heng khaw pahniha chengte hi, an in leh lo chhuahsan tura hriattirin, an chenna hmun tur ngaihtuah sak a tiam a, ni 40 chhunga zángnadawmna pek a lo tiam tawh nia tarlan a ni. Assam Finance Minister Himanta Biswa Sarma chuan, National Park kianga khaw pathum hruaitute chu a titi pui tawh thu sawiin, September 19-21 chhungin eviction drive kalpui tur a nih thu hi hrilhhriat an ni tawh tih a sawi.

Banderdubi-ah hian chhung-kaw 190 an cheng a, Deochur-chang-ah chhungkaw 160 an khawsa mek bawk. Heng mite nawr chhuak tur hian thuneitute chuan sai, excavator leh roller-te a ruahman a, Banderdubi, Deosursang leh Palkhowa-a in dingte chu nawr chhiat tura tih a ni. Heng khaw pathuma chengte hi a tam zawk chu ṭhenawm ram Bangladesh aṭanga pem lut leh khawsa zui tate nia sawi a ni. Court chuan kum 2015 October 9 khan Forest (Conservation) Act, 1980 tlawhchanin, tuna heng khua awmna te hi ‘forest land’ tiin a lo puang tawh a ni.

Hetihlai hian Assam Chief Minister Sarbananda Sonowal chuan eviction drive kalpui a nih avanag buaina chhuaka nunna chan te chu cheng nuai nga pek an nih tur thu a sawi a, hliam zinga a ngaihtuahawm zualte chu cheng nuai hnih pek an nih tur thu a sawi. Assam Education, Health and Finance minister Himanta Biswa Sarma chuan, Court thupek anga hma lak a nih thu sawiin, ram neitu din tak hnenah zángnadawmna chu pek a ni ang, a ti.

Tharum thawhna thleng avang hliam tur zingah hian police pawh 14 lai an tel nia tarlan a ni. Buiana lian zawk a chhuah lohna turin venhimna khauh taka kenkawh zui nghal a ni.