Bangladesh-a hel chetnain India a nghawng: Shringla

Indian High Commissioner to Bangladesh Harsh Vardhan Shringla chuan Bangladesh-a hel pawikhawihna thleng chuan India ramah nghawng a nei ve zel tih a sawi.

Shringla hian tunhnai khan Tripura tlawhin, Agartala-ah thuthar thehdarhtute a kawm. Shringla chuan, “Ramri kana heltte chetna tam zawk chu finfiah loh a ni, Bangladesh leh India inrina thui tak kaltlanga hel te chetna hi ram pahnih tan a him lo ve ve a ni" a ti. India palai chuan tun hnaia hel pawikhawihna rapthlak tak Dhaka-a thleng avangin Bangladesh chuan hel do let kawngah nasa takin ṭan a la a ni, a ti bawk.

Kumin July-a New Delhi-a Home Minister-level meeting chungchang sawichhuakin, Shringla chuan India leh Bangladesh-te chuan hel do let kawngah thawk dun tura inremna an siam thei chu lawmawm a tih thu a sawi. Shringla chuan Indo-Bangla border chungchang chu Tripura Chief Minister Manik Sarkar, Chief Secretary Yashpal Singh leh sorkar mi pawimawh dangte a sawipui tawh tih a sawi. “Bangladesh security force-te chuan Indo-Bangla border-ah hel dap chhuah beihpui an thlak mek a, hmarchhak hmun hrang hranga pawikhawihna thlen ṭhin hel pawl Bangladesh-a Camp neite pawh beih let zel an ni" a ti. Hemi kawngah hian India leh Bangladesh-te chuan thawhdunna ṭha tak an neih thu sawiin, Banglades sorkar chuan a ram chhunga hel a man eng emaw zat chu India kutah a hlan tawh a ni, a ti.

Bangladesh Prime Minister Sheikh Hasina chu hel laka beihpui thlak mekah ngaih-tuahna seng nasa ber te zing a mi a nih thu Shringla chuan a sawi. Border district-a District Magistrate leh Deputy Commi-ssioner-te pawh hemi kawngah hian hma la tura hriattir an nih thu a sawi bawk.

India leh Bangladesh inrinna thui zawng hi km 4,096 zet a ni a, heng zinga 78% vel chauh hung a la ni. India ram state West Bengal (2,216km), Tripura (856km), Meghalaya (443km), Mizoram (318km) leh Assam (263km) te chuan Bangladesh hi a ri a ni.