Aadhar chungchangah meeting nei

Arunachal Pradesh Chief Minister Pema Khandu leh Unique Identification Authority of India (UIDAI) Chief Executive Officer Dr. Ajay Bhushan Pandey-te chuan Thawhṭanni khan Itanagar-ah meeting an nei a, Aadhar chungchang an sawi dun.

Pema Khandu chuan “Arunachal mipuite chu eirukna laka fihlim sorkar din turin thawhpuiah sorkar chuan a sawm a, mipuite chuan sorkar an thlawp ṭha hle a ni. Tunah hian Aadhaar, Jan Dhan Yojana leh direct benefit transfer kalpui mek a ni a, mipuite'n harsatna an tawh lohna turin theihtawp chhuahin sorkar chuan hma a la a ni" a ti. Dr Pandey chuan Aadhaar neih leh neih loh chu mipuite duhthlanna a nih thu sawiin, sorkar aṭanga hamṭhatna chan duh leh India khua leh tuite nihna anga thlir erawh chuan tih ngei ngai niin CM chu a hrilh. Sorkar laipui policy leh programme zawng zawngte chu Aadhaar hmanga thlunzawm vek tura ruahman a ni a ti a, hei hian chhiah lak tihchingpen leh awlruk kawngah nasa takin a veng thei dawn a ni, a ti.

UIDAI Chief Exe-cu-tive Officer Dr. Pandey India ram mipui vaibelchhe 121 zinga vaibelchhe 105-te chuan Adhaar card an neih tawh tih a sawi. Arunachal Pradesh-ah hian mi nuai riat vel Adhaar card nei thei an awm a, hemi buaipui nan hian UIDAI chuan cheng vaibelchhe 10 a ruahman sak tih a sawi. Arunachal-ah hian mi nuai nga vel Aadhaar la siam tir lo an awm niin CM chuan a sawi a, mipuiten sorkar laipui aṭanga hamṭhatna awm theite an chan theihna turin chak taka hmalak a ni ang, a ti. Chief Secretary leh Finance Minister-te chu hemi chungchanga hma la tura hrilhhriat an ni tawh tih a sawi bawk.

Arunachal-ah hian hmun kilkhawr leh motor luh theih lohnaahte Para-military force-te chu che chhuak tura ngen an ni a, Aasha worker, Anganwadi worker leh zirtirtute pawh enrolment kalpui mekah hian pun an nih tur thu CM Khandu chuan UIDAI Chief Executive Officer Dr. Pandey a hrilh.